Nær helmingur vændiskaupenda í Noregi handtekinn í Þrándheimi

Það hefur vakið athygli í Noregi að af þeim tæplega 370 mönnum sem handteknir voru fyrir vændiskaup í fyrra var nær helmingur þeirra tekinn í Þrándheimi.

Í umfjöllun blaðsins Verdens Gang um málið segir að allir séu sammála um að vændi sé ekki stundað meira í Þrándheimi en öðrum borgum Noregs. Raunar er vitað að vændi er mun umsvifameira í Osló, Stavanger og Bergen.

Tölurnar eru hinsvegar verulega á skjön við þann veruleika. Af þessum tæplega 370 mönnum sem handteknir voru við vændiskaup í fyrra voru 164 þeirra teknir í Þrándheimi en aðeins 100 í Osló.

Rætt er við Arve Nordvedt lögreglustjóra í Þrándheimi sem segir að ástæðan fyrir því að vændiskaupendur séu teknir oftar í borginni en á öðrum stöðum í landinu sé vegna þess að lögreglan í Þrándheimi hefur baráttu gegn vændiskaupum sem eitt af forgangsmálum sínum. Aðspurður telur hann slíkt ekki sóun á starfskröftum lögreglunnar.

Blaðið ræðir einnig við vændiskonu frá Austur-Evrópu um málið. Hún segir að það sé altalað meðal starfssystra sinna að Þrándheimur sé langversti staðurinn í Noregi til að stunda vændi. Hún segir að tveir til þrír lögreglumenn sitji um hverja vændiskonu sem reynir að starfa í Þrándheimi.