Ekkert lát á skotbardögum glæpagengja í Kaupmannahöfn

Ekkert lát er á skotbardögum milli glæpagengja í Kaupmannahöfn og víðar í Danmörku.

Síðasti bardaginn var við Lundtoftgade á Norðurbrú í gærkvöldi þar sem um 30 meðlimum tveggja gengja laust saman. Lögreglan segir að í þessum skotbardaga hafi yfir 20 skotum verið hleypt af úr þremur mismunandi vopnum, tveimur skammbyssum og einni haglabyssu.

Ekki er vitað hvort nokkur hafi særst í þessum bardaga en blóðspor á vettvangi benda til að svo sé. Nokkrir bílar eru skemmdir eftir skothríðina og skotför má sjá á veggjum nærliggjandi íbúða.