Ónæmi gegn sýklalyfjum er ógn við þjóðaröryggi Breta

Prófessor Dame Sally Davies landlæknir Bretlands segir að vaxandi ónæmi sýkla gegn sýklalyfjum sé orðin álíka ógn við þjóðaröryggi Breta og hryðjuverk. Ónæmið sé tifandi tímasprengja meðal þjóðarinnar.

Davies segir að venjulegar skurðaðgerðir verði orðnar lífshættulegar innan tuttugu ára ef Bretar tapa baráttunni gegn sýkingum. Davis hvetur bresk stjórnvöld til þess að setja málið á dagskrá á næsta fundi leiðtoga G8 ríkjanna.

Jafnframt segir hún að lyfjafyrirtæki þurfi að finna ný lyf til að berjast gegn þessari vá. Ekki hafi verið búin til ný sýklalyf síðan á níunda áratug síðustu aldar.