Fílharmoníuhljómsveit Vínar gerir upp nasistafortíð sína

Hin heimsþekkta Fílharmoníuhljómsveit Vínar í Austurríki hefur loksins ákveðið að gera upp fortíð sína hvað varðar valdatíma nasista í landinu fyrir rúmum 70 árum síðan.

Stjórn hljómsveitarinnar hefur boðað skýrslu eða svokallaða Hvítbók um starfsemi hennar á árunum eftir 1938 þegar Adolf Hitler innlimaði Austurríki í það sem síðan kallaðist þýska stórríkið. Skýrslan er gerð í tengslum við að 75 ár eru liðin frá þessum atburði.

Meðal þess sem greint verður frá í skýrslunni er að Baldur von Schirach þáverandi borgarstjóri Vínar fékk sérstakan heiðurshring frá hljómsveitinni árið 1942. Baldur er þekktur fyrir að hafa sent tugþúsundir austurrískra gyðinga í útrýmingarbúðir nasista eftir að hann tók við völdum í Vín. Þar á meðal sendi hann 13 tónlistarmenn úr hljómsveitinni og voru 5 þeirra myrtir í búðunum.

Í nýlegri frétt í New York Times kemur fram að heimsfrægir áramótatónleikar hljómsveitarinnar, þar sem Strauss er hafður í hávegum, hafi í upphafi eða árið 1939 verið áróðurstónleikar af hálfu nasistanna sem þá stjórnuðu öllu listalífi í Vín.