Forseti Írans harðlega gagnrýndur fyrir að faðma móður Chavez

Pólitískir andstæðingar forseta Írans hafa gagnrýnt hann harðlega fyrir að hafa faðmað móður Hugo Chavez í jarðarför Chavez í Venesúela um helgina.

Á myndum frá jarðarförinni má sjá hvar Mahmoud Ahmadinejad forseti Írans tekur grátandi móður Chavez, hina 78 ára gömlu Elenu Frias de Chavez, í faðm sér og huggar hana í sorg sinni.

Pólitískir andstæðingar forsetans í Íran hafa brugðist ókvæða við þessum myndum og segja að Ahmadinejad hafi móðgað virðingu Íslams og gerst sekur um haram í jarðarförinni. Haram er hugtak yfir alvarleg brot gegn íslömskum trúarlögum. Haram kveður m.a. á um að enginn maður má snerta konu af annarri trú en íslam undir neinum kringumstæðum.

Gagnrýnin hefur gengið svo langt að íhaldssamir klerkar í Íran segja forsetann hafa misst stjórn á sér og saka hann um athæfi sem jaðri við trúvillu.

Í erlendum fjölmiðlum kemur fram að þessi gagnrýni tengist harðri valdabaráttu sem fer fram bakvið tjöldin um hver eigi að taka við stöðu Ahmadinejad sem næsti forseti Íran.