Lést af slysförum

Yfirvöld í Texasfylki í Bandaríkjunum hafa staðfest að lát hins þriggja ára Max Shatto, rússneska drengsins sem ættleiddur var til Bandaríkjanna, hafi verið slys.

Shatto, fæddur Maxim Kuzman, lést í umsjá kjörforeldra sinna í janúar, nokkrum mánuðum eftir að þau ættleiddu hann og hálfbróður hans frá Rússlandi.

Niðurstöður úr krufningu sýna að Shatto lést af völdum rifinnar slagæðar í maga, en áverkarnir voru svipaðir þeim sem hann hafði áður veitt sjálfum sér. Sú hegðun drengsins var til skoðunar hjá læknum, en hann er talinn hafa veitt sér áverkana þegar hann lék sér í bakgarði Shatto-fjölskyldunnar ásamt bróður sínum.

Dauði drengsins hefur valdið stirðleika milli Bandaríkjanna og Rússlands, en ráðamenn í Rússlandi hafa sakað kjörmóður hans um morð.

Um sextíu þúsund rússnesk börn hafa verið ættleidd til Bandaríkjanna frá falli Sovétríkjanna árið 1991, en þann 1. janúar síðastliðinn tók bann við ættleiðingum Bandaríkjamanna á rússneskum börnum gildi.