Krókódíll í Thames sagður brúða úr James Bond

Tilkynnt var um krókódíl í ánni Thames á Englandi í síðustu viku, og vakti málið eðlilega athygli, enda áin nokkuð fjarri heimkynnum krókódíla. Var krókódíllinn meðal annars sagður hafa étið lifandi álft.

En nú þykir líklegt að um leikmun kvikmyndar sé að ræða, nánar tiltekið úr James Bond-myndinni Live and Let Die frá árinu 1973, og að sjónarvottar hafi látið ímyndunaraflið hlaupa með sig í gönur.

Reading-búinn Michael Law segir krókódílinn vera brúðu sem notuð var í fyrrnefndri mynd, þar sem leikarinn Roger Moore sést stökkva á milli krókódíla til þess að komast úr háska, en að sögn Law kemur brúðan úr safni yfirmanns bátaþjónustu sem starfað hefur fyrir ýmsar kvikmyndir.

Leikmunurinn hafi verið geymdur á eyju í Thames og hljóti að hafa skolast í burtu í flóði og því hafi sjónarvottar talið að um alvöru skepnu væri að ræða. Talsmaður bátaþjónustunnar staðfesti að leikmunir hefðu verið geymdir á eyjunni en gat ekki sagt til um hvort krókódílabrúðan væri enn á eyjunni.

Sérfræðingar hafa sagt að engin leið væri fyrir krókódíl að lifa í ánni, til þess væri hún of köld.

Í meðfylgjandi myndbandi má sjá umrædda krókódílasenu úr kvikmyndinni Live and Let Die.