Segir hjólreiðar óumhverfisvænar

Ríkisþingmaður í Washington-fylki Bandaríkjanna gefur lítið fyrir staðhæfingar um að hjólreiðar séu umhverfisvænar.

Hjólreiðamaður sem sendi þingmanninum, repúblikananum Ed Orcutt, tölvupóst vegna óánægju með nýjan hjólreiðaskatt í fylkinu, fékk undarlegt svar frá Orcutt.

„Ef mér skjátlast ekki þá eykst hjartsláttur manna við hjólreiðar og þeir gefa frá sér meiri koltvísýring en ella. Koltvísýringur er mengandi og því má segja að hjólreiðamenn mengi þegar þeir hjóla."

Í samtali við hjólreiðabloggsíðu í Seattle gengur þingmaðurinn lengra.

„Það kemur í raun meiri koltvísýringur frá hjólreiðamanni en er í útblæstri bíls."

Bætir hann því svo við að hann hafi reyndar ekki rannsakað það nákvæmlega, en hann virðist nokkuð viss í sinni sök.