Ósvífni í umræðukerfum hefur mótandi áhrif á fólk

Svo virðist sem að ókurteis og dónaleg ummæli í umræðukerfum fréttamiðla geti haft mótandi áhrif á skilning fólks á fréttum.

Það var bandaríska stórblaðið The New York Times sem greindi frá þessu á dögunum. Þar var fjallað um rannsóknarniðurstöður bandarískra félagsvísindamanna sem rýndu í áhrif hins svokallaða athugasemdakerfis. Niðurstöðurnar voru nokkuð afdráttarlausar.

Framkvæmd rannsóknarinnar var á þann veg að hópur fólks var látinn lesa frétt um tiltekna tækninýjung. Þeim var síðan skipt niður í tvo minni hópa, annar las umræður sem einkenndust af heilbrigðum skoðanaskiptum á meðan hinn las ósvífin og ómálefnaleg ummæli.

Umræðukerfið hafði ekki mótandi áhrif á fyrri hópinn en í flestum tilfellum voru þátttakendur í seinni hópnum afar neikvæðir á nýjungina og var sérstaklega umhugað um mögulegar hættur sem tengdust henni.

„Þetta nýja landslag fjölmiðla hefur getið af sér breytta umræðuhefð, þar sem félagslegar hefðir og venjur sem einkenna daglegt líf okkar eru ekki til staðar. Þessir miðlar hafa bæði áhrif á hvað við sannarlegum þekkjum og vitum ásamt því að hafa mótandi áhrif á hvað við teljum okkur vita fyrir víst," segir í niðurstöðunum.

Lesendur Vísis eru hvattir til að lýsa skoðunum sínum á rannsókninni í umræðukerfinu hér fyrir neðan. Hægt er að nálgast umfjöllun The New York Times hér en sjálfa rannsóknina má nálgast hér.