Spielberg dustar rykið af handriti Kubrick

Steven Spielberg ætlar að dusta rykið af handriti Stanley Kubrick um franska keisarann Napoleón Bónaparte. Kubrick lagði handritið á hilluna á áttunda áratugnum.

Spielberg staðfesti þetta í samtali við franska fjölmiðilinn Canal+. Leikstjórinn ætlar sér þó ekki að gera kvikmynd um líf Frakkans heldur sjónvarpsþáttaröð.

Spielberg, sem leikstýrði síðast kvikmyndinni Lincoln um samnefndan Bandaríkjaforseta, vann síðast með Kubrick við gerð kvikmyndarinnar A.I. Artificial Intelligence. Handritið var einmitt skrifað á áttunda áratugnum en lagði grunninn að myndinni sem Spielberg leikstýrði.

Kubrick þykir einn fremsti leikstjóri allra tíma. Meðal kvikmynda á ferilskrá hans eru 2001: A Space Odyssey, The Shining, Dr. Strangelove og Eyes Wide Shut sem var síðasta mynd hans. Kubrick lést árið 1999. Nánar á fréttavef BBC.