Fjölmiðlastríð vegna hamborgarakeðju

Enn eitt fjölmiðlastríðið hefur blossað upp milli blaða í Danmörku og Svíþjóð.

Síðasta fjölmiðlastríð hófst í kjölfar frétta í sænskum fjölmiðlum um síðustu aldamót um að Margrét Þórhildur drottning Dana hefði brugðið sér afsíðis í opinberri veislu í Stokkhólmi til að reykja eina af sínum grísku sígarettum þótt það væri stranglega bannað í viðkomandi höll. Þetta þótti sænsku fjölmiðlunum hið mesta hneyksli en þeir dönsku svöruðu fyrir sig með því að segja málið vera hræsni í Svíum.

Í dag snýst stríðið um hamborgara. Sænska hamborgarakeðjan Max opnaði fyrsta hamborgarastað sinn í Kaupmannahöfn í síðustu viku. Gagnrýnendur veitingahúsa í dönskum fjölmiðlum eru á einu máli um að Max hamborgarar séu nokkru síðri en auglýsingar um þá gefa í skyn. Þetta hefur leitt til þess að sænskir fjölmiðlar segja opnun Max hafa vakið öfund í Danmörku og jafnvel gengið svo langt að segja að Danir hafi alveg misst bragðalauka sína vegna reykinga.

Ekstra Bladet eins og oft áður hóf þessa umræðu með gagnrýni á fyrsta staðinn undir fyrirsögninni að sænska hamborgarkeðjan væri Max ömurleg. Aftonbladet hefur svarað þessu fullum hálsi og segir málið sé enn ein öfund Dana í garð stóra bróður síns.