Hugo Chavez látinn

Forseti Venesúela, Hugo Chavez, er látinn eftir tveggja ára baráttu við krabbamein. Varaforseti Venesúela greindi frá þessu í sjónvarpsávarpi í kvöld. Þar með er fjórtán ára veru Chavez í forsetastól Suður-Ameríkulandsins á enda.

Reuters greinir frá þessu. Yfirvöld í Venesúela greindu frá því í gær að forsetinn væri þjakaður af alvarlegri sýkingu í öndunarfærum og að brugðið gæti til beggja vona um hvort hann lifði hana af eða ekki. Sýkingin hefði versnað til muna síðastliðna daga.

Leiðtoginn 58 ára hafði gengist undir fjórar aðgerðir á Kúbu vegna krabbameins sem gerði fyrst vart við sig á mjaðmarsvæðinu um mitt árið 2011. Síðasta aðgerð hans var 11. desember og hafði forsetinn ekki sést opinberlega síðan þá.

„Þetta er augnablik mikils sársauka,“ sagði Maduro umkringdur ráðherrum í ávarpi sínu í kvöld. Mátti heyra að hann átti erfitt með að koma upp orðunum.

Chavez vann yfirburðasigur í forsetakosningunum í október síðastliðnum en kosið er til sex ára í senn í Venesúela. Dauði forsetans mun valda milljónum stuðningsmanna hans miklum vonbrigðum. Fylgismenn Chavez heilluðust ekki síst af sjarma hans, andstöðu hans við yfirvöld í Bandaríkjunum og stefnu í olíumálum sem færðu fólki í fátækrarhverfum mat og ókeypis heilbrigðisþjónustu.

Andstæðingar Chavez litu á hann sem einræðisherra með of mikið sjálfsálit sem fór illa með olíulindir Venesúela manna.

Meðfylgjandi mynd var birt af Chavez að lokinni aðgerðínni á Kúbu í desember. Með honum á myndinni eru dætur hans tvær.