Herinn kallaður út til að tryggja friðinn í Venesúela

Herinn hefur verið kallaður út í Venesúela í kjölfar andláts Hugo Chavez forseta landsins. Líkur eru taldar á óeirðum í kjölfar andlátsins og er hernum ætlað að tryggja friðinn þar til nýr forseti hefur verið kosinn.

Margir þjóðarleiðtogar hafa vottað fjölskyldu Hugo Chavez virðingu sína í kjölfar andláts forsetans í gærdag. Þar á meðal flest allir leiðtogar landa í Suður Ameríku sem og Barack Obama, forseti Bandaríkjanna, og Ban Ki-moon framkvæmdastjóri Sameinuðu þjóðanna.

Hugo Chavez lést frá eftir tveggja ára erfiða baráttu við krabbamein 58 ára að aldri. Þjóðarsorg ríkir í Venesúela og þjóðarsorg hefur verið lýst yfir á Kúbu þar sem Chavez er kallaður besti sonur Fidels Castro.

Samkvæmt lögum tekur forseti þingsins í Venesúela við stöðu forseta landsins þar til nýr forseti hefur verið kjörinn. Reiknað er með nýjum kosningum innan 40 daga.