Vinningurinn nýttur í baráttu eiginkonunnar við krabbamein

Körfuboltaáhugamaðurinn Heath Kufahl fagnaði ógurlega þegar skot hans frá miðju á NBA-leik á dögunum hafnaði í körfunni.

Atvikið átti sér stað í hléinu á milli þriðja og fjórða leikhluta í viðureign Oklahoma City Thunder og Los Angeles Lakers í nótt. Eins og algengt er fékk einn áhorfandi að spreyta sig á skoti frá miðju og í boði voru 20 þúsund dalir eða vel á þriðju milljón íslenskra króna.

Samkvæmt dagblaðinu Daily Oklahoman glímir eiginkona Kufahl, Jenni, við krabbamein og mun allur peningurinn fara í að standa straum af meðferðinni. Jenni Kufahl er sjö barna móðir og hörð barátta framundan hjá henni við sjúkdóminn banvæna.

„Ég er reyndar stuðningsmaður Lakers," segir Kufahl sem klæddist treyju Oklahoma-liðsins en leikurinn fór fram í samnefndri borg. „Ekki segja neinum að ég hafi neyðst til þess að klæðast treyju Thunder-liðsins."

Kufahl, sem er körfuboltaþjálfari við einkaskóla í úthverfi Oklahoma-borgar, varð fyrsti áhorfandinn til þess að hitta úr miðjuskotinu á leik liðsins frá 2011.

Skotið má sjá hér fyrir neðan.