Berlusconi dæmdur í fangelsi

Silvio Berlusconi, fyrrverandi forsætisráðherra Ítalíu, hefur verið dæmdur í eins árs fangelsi vegna ólöglegra hlerana.

Berlusconi var dæmdur fyrir að láta hlera pólitískan andstæðing sinn og birta upplýsingarnar í dagblaði sem bróðir hans gefur út. Líklegt þykir að Berlusconi áfrýi dómnum og mun hann því ganga laus að sinni.

Fréttaritari BBC í Róm segir reyndar hverfandi líkur á því að forsætisráðherrann fyrrverandi muni þurfa að sitja inni, en dómurinn sé engu að síður enn einn bletturinn á mannorði hans.

Tvö önnur dómsmál eru nú í gangi gegn Berlusconi, skattsvikamál auk kynferðisbrotamáls þar sem hann er sakaður um að hafa haft samræði við vændiskonu undir lögaldri.

Bróðir Berlusconi, Paolo, var einnig dæmdur í hlerunarmálinu og hlaut hann tveggja ára og þriggja mánaða dóm.