Maður í haldi vegna morðs í strætisvagni

Lögreglan í Birmingham á Englandi hefur handtekið 22 ára karlmann sem grunaður er um að hafa stungið sextán ára stúlku til bana í strætisvagni.

Ráðist var á Christinu Edkins í fullum tveggja hæða vagni á áttunda tímanum í morgun og í kjölfarið var lýst eftir árásarmanninum, en hann var handtekinn um klukkan hálf eitt við stórmarkað í borginni.

Talsmaður lögreglu segir allt benda til þess að stúlkan hafi verið valin af handahófi, en verið er að skoða upptökur úr öryggismyndavélum, meðal annars frá vagninum sjálfum.

Edkins var á leið í skólann með strætisvagninum, og segir yfirkennari skólans að hún hafi verið hvers manns hugljúfi, og vinsæl meðal nemenda og kennara.