Tímamóta uppgötvun á Suðurskautslandinu - "Þessi tegund lífs er óflokkuð og óþekkt“

Rússneskir vísindamenn hafa uppgötvað áður óþekkta tegund lífs, djúpt undir íshellu Suðurheimskautslandsins. Um er að ræða bakteríu sem dvalið hefur í risastóru stöðuvatni sem hefur verið einangrað í rúmlega milljón ár.

Bráðabirgðarannsóknir á erfðamengi bakteríunnar og samanburður við gagnagrunna hafa leitt í ljós að þessi tegund gerla hefur aldrei verið rannsökuð af vísindamönnum.

„Þessi tegund lífs er óflokkuð og óþekkt," segir Sergei Bulat, erfðafræðingur hjá kjarnorkustofnuninni í Sankti Pétursborg. „Ef þessi baktería hefði fundist á Mars þá gætum við fullyrt að líf væri að finna á rauðu plánetunni."

Gerillinn fannst við borun vísindamanna í Vostok stöðuvatninu á síðasta ári. Vatnið er á fjögurra kílómetra dýpi. Sjálft stöðuvatnið er 800 metra djúpt og um tíu þúsund ferkílómetrar að stærð. Þarna má finna öfgakenndustu aðstæður jarðar.