Clinton hvetur til lagabreytinga fyrir samkynhneigða

Í bréfi sem Bill Clinton, fyrrverandi forseti Bandaríkjanna, skrifaði og Washington Post birti í gær, segir hann að tími sé kominn til að ógilda lög sem hann skrifaði sjálfur undir árið 1996.

Lögin, sem ganga undir nafninu „Defense of Marriage Act" (lög til varnar hjónabandinu), skilgreina hjónaband sem samning gerðan milli karls og konu, og þar með hafa samkynja hjón í þeim níu ríkjum Bandaríkjanna sem leyfa hjónaband samkynhneigðra ekki mörg af þeim lagalegu réttindum sem önnur hjón hafa.

Þann 27. mars verða lögin til umfjöllunar hjá Hæstarétti og segir Clinton í bréfinu að hann vonist til að rétturinn ógildi lögin, sem hann telur vera á skjön við stjórnarskrá landsins.

Clinton ver ákvörðun sína frá því fyrir fyrir sautján árum og segir að það að skrifa ekki undir lögin hefði mögulega gert það að verkum að bann við giftingum samkynhneigðra hefði verið sett inn í stjórnarskrá.

„Þegar ég samþykkti lögin sendi ég frá mér yfirlýsingu um það að lögin mætti ekki nota sem afsökun fyrir ójafnrétti. Þegar ég les yfirlýsinguna í dag sé ég að lögin eru óréttlát og þau ætti að ógilda."

Bréfið má lesa í heild sinni á vef Washington Post.