Sambandsrof við Alþjóðlegu geimstöðina

Tölvubilun olli því að samband við Alþjóðlegu geimstöðina (ISS) rofnaði í gær í tæpar þrjár klukkustundir.

Tæknimenn í Houston voru að uppfæra hugbúnað geimstöðvarinnar þegar bilunin varð, og rofnaði samband við geimstöðina í kjölfarið. Sex geimfarar starfa í stöðinni, tveir Bandaríkjamenn, þrír Rússar og einn Kanadamaður.

Bilun af þessu tagi er sögð hafa átt sér stað nokkrum sinnum áður, og þykir ekki sérlega alvarleg, en fyrrverandi geimfarinn Jerry Linenger sagði í samtali við BBC að atvik sem þetta væri „ekki hræðilegt" svo lengi sem engar aðrar bilanir ættu sér stað samtímis. Linenger var um borð í rússnesku geimstöðinni Mír árið 1997 þegar eldur kom upp í stöðinni.

Undanfarnar vikur hefur áhöfn ISS gert æfingar þar sem líkt er eftir sambandsrofi við Houston, en með því er verið að kanna hvernig áhöfn getur brugðist við slíkum bilunum í Mars-leiðöngrum framtíðar. Talsmaður NASA, Josh Byerly, segir að bilunin í gær hafi ekki verið hluti af þessum prófunum, en reynslan muni hugsanlega koma að góðum notum.