140 þúsund krónur fyrir "Facerape"

Tveir danskir táningsdrengir voru í dag dæmdir til þess að greiða jafnöldru sinni sex þúsund danskar krónur í sekt fyrir að breyta prófílmynd hennar á Facebook.

Drengirnir settu mynd af getnaðarlim á prófílmynd stúlkunnar sem hafði ekki mikinn húmor fyrir hrekk drengjanna. Skundaði hún á lögreglustöðina í Helsingjaeyri ásamt foreldrum sínum og kærði verknaðinn.

Lögreglumenn höfðu uppi á IP-tölu tölvu þess sem breytinguna gerði og kom upp úr krafsinu að drengirnir tveir voru sökudólgarnir. Þarf annar drengjanna að greiða sekt upp á 4.000 danskar krónur en hinn 2.000 danskar krónur. Upphæðin svarar til 46 þúsund og 92 þúsund íslenskra króna.

Orðið Facerape er notað yfir það þegar einhver kemst inn á Facebook-aðgang notanda og hrekkir hann. Oftar en ekki er ástæðan sú að notandi gleymir að skrá sig útaf síðunni. Yfirleitt verður úr saklaus brandari en lektor í lögfræði við Kaupmannahafnarháskóla segir að málið ætti að verða öðrum víti til varnaðar.

„Þetta er áminning um að leikreglur sem viðhafðar eru utan samfélagsmiðla gilda einnig innan þeirra," segir lektorinn Trine Baumbach. Hún telur að dómurinn geti vel orðið til þess að kærumálum muni fjölga.

„Ég get vel ímyndað mér það. Þetta mál sýnir foreldrum og börnum að áreitni og tölvuhrekkir sé ekki eitthvað sem þurfi að sætta sig við," segir Baumbach.

Þá ráðleggur hún ungu fólki að hugsa sig tvisvar um áður en það tjáir sig á samskiptamiðlum, hvort sem er á eigin síðu eða síðum annarra.

Nánar um málið á danska vefmiðlinum Berlingske.