Segir niðurstöður rannsókna á kjötvörum öruggar

Rannsóknir á þeim sextán sýnum sem Matvælastofnun keypti og rannsakaði, voru framkvæmdar á tveimur mismunandi rannsóknarstofum að sögn Kjartans Hreinssonar, sérgreinadýralæknis hjá Matvælastofnun.

Annarsvegar voru þær framkvæmdar á tilraunstöð Háskóla Íslands í meinafræðum á Keldum og svo hjá Matís ohf. Kjartan segir niðurstöðurnar öruggar.

„Við keyptum sýnin eins og hver annar neytandi. Það var ekkert forval, heldur var þessu hagað þannig að við keyptum matvörurnar eins og þegar venjulegur neytandi kaupir í matinn," útskýrir Kjartan. Spurður hvort einhver mistök geti átt sér stað í þessu ferli segir Kjartan að ef minnsti vafi leiki á að niðurstöðurnar séu rangar þá er rannsóknin alltaf endurtekin. „Þetta eru öruggar niðurstöður," bætir hann við.

Kjartan segir Matvælastofnun hafa lagst í rannsóknina til þess að kanna hvort það mætti finna sambærileg tilvik hér á landi og hafa komið upp í verslunum í Bretlandi, þar sem ítrekað hefur komið í ljós að nautakjöti hafi verið skipt út fyrir hrossakjöt.

Ekkert hrossakjöt fannst í sýnunum sem voru rannsökuð, en rannsóknin ætti að gefa nokkuð góða mynd af ástandi matvælamarkaðsins hér á landi að sögn Kjartans. Þó hafi komið þeim á óvart, þessi aukaniðurstaða eins og Kjartan orðar það. Þar vísar hann til skorts á kjöti í nautaböku Gæðakokka sem og í lambahakkbollum.

Magnús Nielsson, eigandi Gæðakokka í Borgarnesi, sagði í viðtali við Vísi í dag að mælingar Matís hlytu að vera ónákvæmar, en ekkert kjöt fannst í nautaböku fyrirtækisins. Það þótti Magnúsi sérkennilegt. Honum hefur verið gert að innkalla þessar tvær vörutegundir úr verslunum auk þess sem Kostur sendi frá sér tilkynningu í dag þar sem kom fram að vörurnar hefðu verið teknar úr sölu þar til innihaldslýsingin rímaði við innihaldið.