„Ég kann ekki skýringar á þessu," segir Magnús Nielsson, annar af eigendum Gæðakokka í Borgarnesi, en Matvælastofnun rannsakaði tvær vörutegundir frá fyrirtækinu og kom þá annarsvegar í ljós að Nautabaka frá fyrirtækinu, sem sögð var innihalda 30% nautahakk í fyllingu - sem átti að vera helmingur af þyngd vörunnar - innihélt ekkert kjöt (ekkert dýraprótein).

Þá kom einnig í ljós að lambahakkbollur framleiddar af sama aðila fyrir Kost og sagðar innihalda lamba- og nautakjöt innihéldu eingöngu lambakjöt.

Magnús segir það raunar rétt að lambahakkbollurnar innihaldi ekki nautakjöt. „En þær bollur voru alltaf seldar sem lambahakkbollur. Í fyrstu notuðum við nautahakkið til þess að minnka fituinnihaldið en svo fengum við betra efni sem við notuðum í staðinn," segir Magnús og bætir við að það hafi staðið til að betrumbæta innihaldslýsingar á matnum.

Hann segist þó engar skýringar hafa á niðurstöðum Matvælastofnunar á nautabökunni, sem er seld í Krónunni og Nettó. „Ég sé ekki aðrar skýringar en að þetta séu ónákvæmar mælingar," segir Magnús og útskýrir að það sé einnig nautakraftur í matnum og fleira, „samt mælist ekki einu sinni dýraprótein," segir Magnús sem þykir það undarlegt.

Hann segist fá hráefnið frá SS og segir fyrirtækið mjög fagmannlegt í öllum viðskiptum, „ég veit að kjötið sem við kaupum þaðan er gott nautakjöt," segir hann.

Spurður hver næstu skref séu svarar Magnús því að honum hafi verið fyrirskipað að innkalla vörurnar úr verslunum. Hann segist síðan þurfa að fara yfir málið með heilbrigðisfulltrúanum á svæðinu, en sjálfur hafi hann frétt af þessu fyrst í morgun, en hann hafi verið að keyra út vörur og því ekki komist í að sinna málinu sem skyldi.