Páfi í paradís

Þegar Benedikt XVI hefur kvatt kardínála og starfsfólk í Vatíkaninu í dag verður flogið með hann í þyrlu til þorpsins Castel Gandolfo, sem staðsett er rúmum 30 kílómetrum fyrir sunnan Róm.

Þar mun hann koma fram opinberlega síðar í dag sem páfi í síðasta sinn, og eyða næstu vikum í þorpinu á meðan kardínálar Vatíkansins velja eftirmann hans.

Það mun ekki væsa um Benedikt XVI í þorpinu, en íbúar þess eru um átta þúsund. Þorpið tilheyrir Vatíkaninu og páfar hafa dvalið þar á sumrin undanfarin fjögur hundruð ár.

Páfahöllin í Castel Gandolfo er hin glæsilegasta og var byggð í upphafi þrettándu aldar. Garðurinn í kring er sannkallað listaverk og innbúið er ekkert slor heldur.

Þegar kardínálarnir hafa síðan valið nýjan páfa mun Benedikt XVI flytja í klaustur innan Vatíkansins, en þó ekki fyrr en endurbætur hafa verið gerðar á tilvonandi dvalarstað hans.

Í meðfylgjandi myndbandi má sjá þessar glæsilegu vistarverur betur.