Ætla að hlæja fyrir framan Alþingishúsið

Í dag klukkan fimm hefst hátíðin „Kærleikar" sem listakonan Bergljót Arnalds stendur fyrir. Fjöldi fólks kemur þá saman fyrir framan Alþingishúsið þar sem nokkrir þjóðþekktir einstaklingar munu segja nokkur hvatningar- og kærleiksrík orð. Þeirra á meðal er Vilborg Arna Gissuraradóttir suðurpólfari og Anna Bentína frá Stígamótum.

Þá verða sendir góðir straumar út í samfélagið og kveikt á hundruðum stjörnuljósa og kyndla. Ásta Valdimarsdóttir leiðir hláturjóga og fær mannfjöldan til að hlæja fyrir framan Alþingishúsið.

Eyþór Ingi syngur fyrir okkur sigurlagið og framlag okkar Íslendinga til Eurovision „Ég á líf". Undirleikararnir eru höfundar lagsins sjálfir Pétur Guðmundsson og Örlygur Smári. Í kjölfarið verður gengin Kyndlaganga frá Austurvelli hringinn í kringum tjörnina. Lúðrasveitin Svanurinn spilar fyrir göngunni. Gangan endar við Iðnó þar sem boðið verður upp á heitt súkkulaði og Vocal Project undir stjórn Matta Sax syngur nokkur lög. Andlitsmálun Öldu Brynju býður krökkum andlitsmálningu. Aðrir sem koma fram eru eldgleypar úr Leiklistarskólanum, Leikhópurinn Perlan, Sóla sögukona og Sönglist.

Markmið hátíðarinnar er að efla samkennd, hlýju og veita styrk.