Sannfærð um að flokkurinn vinni að sátt um Bjarna Ben

Hanna Birna Kristjánsdóttir segist alltaf hafa ætlað að standa við þau orð sín um að fara ekki aftur í formannsslag við Bjarna Benediktsson. Hún er sannfærð um að flokkurinn muni tryggja sátt um Bjarna á landsfundi.

„Ég held að framboð mitt geti styrkt forystuna og geti styrkt flokkinn, ég er búin að taka að mér forystu hlutverk í Reykjavík og ég hlakka til að takast á við enn frekari verkefni," segir hún.

Hún segir þrýsting hafa verið til staðar í nokkurn tíma að fara aftur í formannsslag við Bjarna Benediktsson eftir að hún tapaði fyrir honum á síðasta landsfundi í nóvember 2011, en hún hafi ávallt neitað því.

„Ég er ítrekað búin að segja það, ég sagði það inni á landsfundi að kjörið þá fyrir rúmu ári síðan snérist um að velja þann sem myndi leiða okkur í gegnum þessar kosningar, ég sagði það eftir þann fund, ég sagði það eftir prófkjörið í Reykjavík og orð skulu standa. Ég mun ekkert breyta þeirri ákvörðun minni og vona að menn virði að og skilji."

Hún segist þakka þann stuðning sem henni er sýndur í nýrri skoðanakönnun sem óþekkt félag lét framkvæma en þar töldu 82 prósent aðspurðra að Hanna Birna yrði sterkari formaður flokksins en Bjarni.

Heldur þú að það sé sátt innan flokksins með Bjarna sem formann fyrir næstu kosningar? „Bjarni hefur verið kosinn í þrígang á landsfundi og notið til þess trausts og hann er að óska eftir því að fá að klára verkefnið og já ég er sannfærð um að Sjálfstæðisflokkurinn muni tryggja það að við vinnum öll sameiginlega að því," segir hún.