Mafían talin tengjast hrossakjötshneykslinu

Hrossakjötshneykslið sem hófst nýlega í Bretlandi verður stöðugt umfangsmeira. Nú er mafían í tveimur löndum sögð tengjast því og grunsemdir eru uppi um að kjöt af ösnum hafi einnig verið notað í tilbúna rétti í stað nautakjöts.

Hrossakjötshneykslið í Bretlandi hefur smitað út frá sér til meginlands Evrópu. Það nær til Írlands, Póllands, Rúmeníu, Kýpur, Lúxemborgar og nú síðast Frakklands.

Í frétt á vefsíðu BBC um málið segir að ráðherrar landbúnaðarmála og neytendamála í Frakklandi muni halda neyðarfund um málið í dag.

Sex franskar stórverslanakeðjur hafa þegar tekið allar allar vörur frá framleiðendunum Findus og Comigel, þar sem nautahakk er sagt til staðar, úr hillum sínum. Þetta var gert í framhaldi af því að hrossakjöt fannst í töluverðu magni í samskonar vörum í Bretlandi. Fyrrgreindir ráðherrar vilja tryggja að allar vörur sem hugsanlega innihaldi hrossakjört í stað nautakjöts verði fjarlægðar úr verslunum í Frakklandi.

Í blaðinu Daily Mail kemur fram að stór hluti af hrossakjötinu sé uppruninn í Rúmeníu og raunar eru fréttir um að kjöt úr ösnum hafi einnig blandast því áður en það var sent vestur á bóginn til notkunar sem nautakjöt í tilbúnum réttum hjá Findus og Comigel.

Þá segir að bæði ítalska mafían og sú rúmenska séu grunaðar um flutninginn á þessu kjöti milli landa og að mafíubófar hafi mútað eða hótað því fólki sem átti að hafa eftirlit með kjötinu. Mafían á að hafa notað Kýpur og Lúxemborg sem áfangastaði fyrir kjötið áður en það var selt.

Búið er að upplýsa evrópsku lögregluna Europol um mafíutengslin og von er á rannsókn Europol á þeim tengslum. Breska lögreglan hefur þegar hafið rannsókn á málinu og segir að hún sé í samstarfi við lögregluyfirvöld í öðrum löndum.