Ein hjúskaparlög í Frakklandi?

Ein hjúskaparlög fyrir alla hafa verið samþykkt í neðri deild franska þingsins með 329 atkvæðum gegn 229. Lögin bíða nú samþykkis efri deildar þingsins, en taldar eru líkur á að þau verði staðfest.

Nýju lögin kveða á um að hjónaband sé milli tveggja einstaklinga, en einskorðist ekki við karl og konu. Einnig munu pör af sama kyni geta ættleitt börn, fari svo að lögin verði samþykkt, en Frakkland yrði með þessu tólfta ríkið til þess að lögleiða hjónaband samkynhneigðra.

Um sextíu prósent Frakka segjast styðja hjónaband samkynhneigðra, en stuðningurinn lækkar niður í fimmtíu prósent þegar spurt er um afstöðu þeirra til ættleiðinga samkynhneigðra.