Tveggja ára fangelsi fyrir barnasmygl

Tveir franskir hjálparstarfsmenn hafa verið dæmdir í tveggja ára fangelsi fyrir að reyna að flytja 103 börn ólöglega frá Tsjad og til ættleiðingar í Frakklandi, undir því yfirskyni að þau væru munaðarlaus börn frá Darfur-héraði í Súdan.

Þau Eric Bretau og Emilie Lelouch störfuðu fyrir hjálparsamtökin Zoe's Ark og voru handtekin ásamt fjórum öðrum í Tsjad árið 2007, þar sem þau reyndu að koma börnunum um borð í flugvél á leið til Frakklands.

Sexmenningarnir voru náðaðir af forseta Tsjad, eftir að hafa verið dæmdir til átta ára þrælkunarvinnu fyrir mannrán, en réttað var yfir þeim í Frakklandi fyrir ólöglega milligöngu um ættleiðingar, fyrir að reyna að koma ólöglegum innflytjendum inn í landið, og fyrir að svindla á þeim frönsku fjölskyldum sem áttu von á börnunum.

Hinir fjórir sakborningarnir í málinu fengu fangelsisdóma á bilinu sex til tólf mánaða langa.