Krafðir greiðslu vegna áhorfs á barnaklám

Spænsk yfirvöld í samvinnu við Evrópulögregluna, Europol, hafa handtekið ellefu manns úr Austur-Evrópu vegna tölvuglæps.

Hinir grunuðu komu hugbúnaði fyrir á tölvum sem sökuðu notendur þeirra um að hafa horft á ólöglegt efni, þar með talið barnaklám. Fólki var sagt að greiða sekt áður en það gæti haldið áfram að nota tölvuna.

Í yfirlýsingu frá Europol kemur fram að tölvuglæpamennirnir hafi fengið notendur til þess að greiða 100 evrur, jafnvirði 15 þúsund króna, sem sekt við glæp sínum.

Eftir að notendur greiddu sektina gátu þrjótarnir stolið gögnum og upplýsingum af tölvum þeirra. Fyrst varð vart við vírusinn í maí 2011 en yfir 1200 tilfelli hafa verið tilkynnt á Spáni. Ekki liggja fyrir tölur frá öðrum löndum.

Rannsóknarlögreglumenn hjá Europol segja að hugbúnaðinum hafi verið komið fyrir á tugum þúsunda tölva um allan heim. Þrjótarnir áttu von á að hafa um eina milljón evra, jafnvirði 171 milljóna króna, af notendum árlega.

Europol telur að 27 ára gamall Rússi sé höfuðpaurinn í glæpagenginu en alls hafa ellefu verið handteknir. Sá rússneski var handtekinn í Sameinuðu arabísku furstadæmunum og bíður þess að verða framseldur til Spánar.

Sex aðrir Rússar, tveir Úkraínumenn og tveir Georgíumenn voru einnig handteknir. Nánar um málið á fréttavef BBC.