Meirihluti Dana vill að Margrét Þórhildur drottning láti af embætti

Meirihluti Dana vill að Margrét Þórhildur drottning sín láti af embættinu og njóti elliáranna í friði og ró.

Þetta eru niðurstöður skoðanakönnunar sem fríblaðið metroXpress í Kaupmannahöfn stóð að. Í henni kemur fram að 25% Dana vilja að Margrét Þórhildur láti strax af embætti og hleypi Friðrik syni sínum að sem nýjum konungi landsins.

Um 35% Dana vilja að drottningin láti af embætti áður en hún fellur frá svo hún fái notið síðustu daga sinna eins og hver annar ellilífeyrisþegi.

Í umfjöllun um málið á vefsíðu börsen segir að almennt séu Danir mjög ánægðir með Margréti Þórhildi. Meðal almennings er hún yfirleitt kölluð gælunafni sínu eða Daisy.

Trine Larsen konunglegur fréttaritari Billed Bladet segir að niðurstöður þessarar könnunnar sýni fyrst og fremst að almenningur telji að ef drottningin vill sjálf láta af embættinu ætti hún að gera það.

Trine og annar sérfræðingur í málefnum dönsku konungsfjölskyldunnar eru sammála um að Daisy muni ekki láta af embætti. Hún hafi áður sagt að hún verði drottning Dana fram að andláti sínu.