Farþegar Carnival Triumph lýsa vistinni um borð sem hreinu helvíti

Farþegar um borð í bandaríska skemmtiferðaskipinu Carnival Triumph komu loks til hafnar í Mobile í Alabama í nótt en skipið var dregið að landi.

Farþegarnir, sem voru rúmlega 3.000 talsins, lýsa vistinni um borð frá því á sunnudag sem hreinu helvíti. Ekkert rennandi vatn um borð, né rafmagn eða loftkæling og klósett skipsins virkuðu ekki. Skólp rann um ganga skipsins og því höfðust flestir farþegana við á dekki þess.

Skipið missti allt afl á sunnudag þegar eldur kom upp í vélarrúmi þess en þá var það á Mexíkóflóa á leið til Texas. Það var því á reki þar til dráttarbátar náðu til þess og drógu það til hafnar.