Hátt í 40 féllu í Bagdad

Hátt í fjörutíu fórust og hundrað og þrjátíu aðrir særðust í röð sprengjuárása í austurhluta Bagdad, höfuðborg Íraks, í dag. Árásirnar einskorðuðust við hverfi þar sem Sjítar eru í meirihluta.

Grunur leikur á að árásirnar séu tilraun uppreisnarmanna til að kasta rýrð á núverandi ríkisstjórn landins þar sem Sjítar eru við stjórnvölin.

Enginn hefur lýst ódæðunum á hendur sér. Svipaðar árásir hafa átt sér stað í Írak á síðustu mánuðum og í flestum tilvikum hafa Súnní-uppreisnarmenn verið þar að verki.

Skotmörkin í dag voru vinsælir markaðir í Bagdad. Fréttaveitan AP hefur eftir sjónarvottum að sprengingarnar hafi verið gríðarlega öflugar og að rúður hafi splúndrast í nærliggjandi götum.