Móðir barnamorðingja varar við reynslulausn

Jeannine Dutroux, 78 ára gömul móðir belgíska barnamorðingjans Marc Dutroux varar dómstóla við því að veita syni sínum reynslulausn, og telur miklar líkur á að hann brjóti aftur af sér.

Hinn 56 ára gamli Dutroux var dæmdur í lífstíðarfangelsi árið 2004 fyrir mannrán, pyntingar og nauðganir á sex stúlkum. Fjórar stúlknanna létust.

Segir Jeannine soninn vera síbrotamann í eðli sínu og alls ekki tilbúinn til þess að afplána dóminn í stofufangelsi, líkt og hann hefur óskað eftir.

Samkvæmt belgískum lögum má veita lífstíðarföngum reynslulausn eftir fimmtán ára afplánun ef þeir teljast ekki hættulegir samfélaginu lengur.