Girnist þú vini þína á Facebook? Nýtt forrit slær í gegn

Þrír menntaskólastrákar fengu hugmynd að Facebook-smáforriti á dögunum og forrituðu það á einni helgi - og síðan þá hefur það slegið í gegn.

Forritið er heldur frábrugðið því sem við þekkjum á samskiptavefnum en það ber nafnið Bang With Friends, sem á íslensku mætti útleggjast sem "Hamraðu vini þína." Í stuttu máli snýst það um að koma á stefnumóti með einhverjum af vinum þínum á Facebook. Þegar þú hefur skráð þig í forritið merkirðu við þá vini sem þú hefur áhuga á og enginn mun komast að því - nema að sá sem þú merktir við merki líka við þig. Þá lætur forritið ykkur vita að þið hafið áhuga á hvoru öðru.

Í fyrstu virðist þetta fáránleg hugmynd en það er ekki raunin. Því á aðeins nokkrum vikum hefur um hálf milljón manna skráð sig til leiks - og merkt við 9 milljónir einstaklinga, eða um 15 að meðaltali á mann. Forritið hefur tengt um 100 þúsund manns saman.

Á fréttasíðunni The Daily beast er forritinu lýst svona: „Langar þig að stunda kynlíf með vinum þínum á Facebook? Hefurðu nú þegar sent þeim skilaboð undir áhrifum áfengis, skrifað misheppnuð skilaboð á vegginn þeirra eða „poke-að" þá, án þess að fá „poke" til baka? Þá gæti forritið Bang With Friends átt vel við þig," segir á síðunni.

Hægt er að skrá sig til leiks á síðunni, bangwithfriends.com