Svíþjóð: Fleiri nýbúar þýða færri félagsleg vandamál

Ný rannsókn í Svíþjóð sýnir að þau sveitar- og bæjarfélög sem hafa hæst hlutfall innflytjenda eða nýbúa innan sinna marka glíma jafnframt við minnstu félagslegu vandamálin.

Rannsókn þessi var unnin á vegum gáfnaveitunnar Reforminstitutet og náði til flestra sveitarfélaga í Svíþjóð. Grunnþættirnir sem mynda lífskjaravísitölu Sameinuðu þjóðanna voru bornir saman við hlutfall innflytjenda eða nýbúa í viðkomandi sveitar eða bæjarfélagi.

Í ljós kom að í þeim 20 sveitar- og bæjarfélögum þar sem minnst var af nýbúum voru félagslegu vandamálin mest. Þá er verið að ræða þætti eins og mikið atvinnuleysi, fólk í vanskilum og fjölda þess fólks sem þarf á félagslegri aðstoð að halda.

Hagfræðiprófessorinn Stefan Fölster segir að í sumum þessara sveita- og bæjarfélega sé atvinnuleysi og önnur félagsleg eymd á pari við það sem er að gerast í Grikklandi og á Spáni.

Í þeim 20 sveitar- og bæjarfélögum þar sem innflytjendur og nýbúar voru hlutfallslega flestir voru félagslegu vandamálin hinsvegar minnst. Fölster segir að það sé því tími til kominn fyrir Svía að þora að ræða um vandamál eigin þegna en ekki bara þeirra sem flytja til landsins.