Auglýsingarnar ollu vonbrigðum

Áhorfendur vestanhafs og víðar urðu fyrir vonbrigðum með auglýsingarnar sem frumsýndar voru í sjónvarpsútsendingu frá leiknum um Ofurskálina (e. Super Bowl) í nótt.

Ólíklegt má telja að auglýsendur taki viðbrögðunum fagnandi enda kostar 30 sekúndna auglýsing um fjórar milljónir dollara eða sem nemur um hálfum milljarði íslenskra króna. Gagnrýnendur virtust á einu máli að nokkrar auglýsinganna hefðu verið vel heppnaðar en heilt yfir hefðu þær valdið vonbrigðum.

Enginn viðburður vestanhafs fær meira áhorf árlega en umræddur leikur. Fjölmargir þeirra sem á horfa hafa umfram allt gaman af auglýsingunum. Í myndbandinu hér fyrir ofan má sjá tíu auglýsingar sem voru meðal þeirra sem fengu betri viðtökur en aðrar.