Mafíustríð um vetrarólympíuþorpið í Sochi í Rússlandi

Mafíustríð er hafið í Rússlandi og það teygir anga sína til borgarinnar Sochi við Svartahaf sem hýsa mun vetrarólympíuleikana á næsta ári.

Stríð þetta hefur farið rólega af stað en það hófst þegar mafíuforinginn Aslan Usoyan var myrtur af leyniskyttu fyrir utan veitingahús sitt skammt frá Kreml í Moskvu í síðasta mánuði. Usoyan, sem gekk undir viðurnefninu Hassan afi, var lýst sem ókrýndum konungi rússnesku mafíunnar þótt hann væri Kúrdi frá Georgíu.

Frá því að Usoyan var myrtur hafa háttsettir meðlimir annarra mafíusamtaka í Rússlandi í nokkrum mæli látið lífið í skotárásum. Azerinn og mafíuforinginn Rovshan Dzhaniyev er talinn hafa staðið að baki launmorðinu á Usoyan. Tveir af liðsforingjum hans eru meðal þeirra sem hafa verið myrtir á síðustu dögum.

Í frétt um málið í breska blaðinu Guardian segir að mafíustríðið í Rússlandi sé m.a. háð um yfirráðin yfir byggingu ólympíuþorpsins í Sochi. Vitað er að Usoyan átti mikilla hagsmuna að gæta í þeirri framkvæmd og þá hagsmuni vilja aðrir mafíuforingjar tryggja að falli sér í skaut.