Fuglalíf í Kolgrafafirði í mikilli hættu

Hættan sem steðjar að fuglalífi hefur margfaldast eftir að síldardauðan í Kolgrafafirði um síðustu helgi. Þetta var í annað sinn sem tugþúsundir tonna af síld drepast. Afleiðingin er sú að grútarlag er yfir allri fjörunni og efst í henni hrúgur af síldarfitu.

Náttúrustofa Vesturlands fylgist grannt með gangi mála en grúturinn er mjög hættulegur fuglum, því þegar hann festist í fjöðrum missa þeir flughæfnina, auk þess sem einangrunargildi fjaðurhamsins verður lítið. Flestir fuglar sem lenda í slíku eiga enga lífsvon án hjálpar.

Í frétt á vef Náttúrustofnunnar segir að eftir seinni síldardauðann hafi áhættan fyrir fuglalíf margfaldast þar sem margir fuglar sækja í fersku síldina í fjörunum og fá þá í sig grút af dauðu síldinni frá í desember. Á síðustu dögum hafa sést grútarblautir fuglar, að minnsta kosti langvía, hvítmáfur og tjaldur, við Kolgrafafjörð og er viðbúið að á næstu vikum muni talsverður fjöldi fugla blotna í síldarfitunni.

Vegfarendur sem verða varir við grútarblauta fugla eru vinsamlegast beðnir um að koma þeim til Náttúrustofu Vesturlands þar sem þeir verða þvegnir. Hafi þeir ekki tök á því mega þeir gjarnan láta vita af slíkum fuglum í s. 898-6638. Þá óskar Náttúrustofan eftir því að komast í samband við sjálfboðaliða sem áhuga hafa á að taka þátt í þvotti á grútarblautum fuglum eða skipulögðum göngum til að leita þeirra.