Fyrrverandi lögga á flótta

Lögreglumenn í Los Angeles leita fyrrum kollega síns sem grunaður er um að hafa drepið þrjá og sært tvo í skotárásum vestanhafs undanfarna daga.

Lögreglumaðurinn fyrrverandi, hinn 33 ára gamli Christopher Dorner, er grunaður vegna bréfs sem hann á að hafa ritað. Þar hótar hann fjölmörgum lífláti, þar á meðal fyrrverandi félögum sínum í lögreglunni í Los Angeles.

Í bréfinu varar Dorner alla lögreglumenn við því að þeim stafi ógn af sér hvort sem þeir séu á vakt eða ekki. Yfirvöld fylgjast grannt með mögulegum skotmörkum Dorner sem starfaði innan lögreglunnar á árunum 2005-2008. Honum var vikið úr starfi fyrir að segja ósatt.

„Auðvitað veit hann hvað hann er að gera. Við þjálfuðum hann," sagði Charlie Beck lögreglustjóri í Los Angeles.

Dorner er talinn hafa drepið Monicu Quan og unnusta hennar, Keith Lawrence, á sunnudagskvöld. Parið var á þrítugsaldri. Lík þeirra fundust í bifreið þeirra á bílastæði fyrir utan heimili þeirra í bænum Irvine í Kaliforníu-fylki.

Faðir Quan, fyrrverandi lögreglumaður, hafði talað máli Dorner fyrir agadómstól sem vísaði honum úr starfi hjá lögreglunni árið 2008.

Þá á Dorner að hafa drepið lögregluþjón við gæslu í bænum Riverside, skammt frá Irvine í morgun. Annar lögreglumaður slasaðist alvarlega þegar hinn grunaði á að hafa komið að fyrrum kollegum sínum úr launsátri.

Tvær konur slösuðust í aðgerðum lögreglu í dag en þá skutu lögreglumenn á pallbíl sem talinn var í eigu Dorner. Önnur konan fékk tvö skotsár en líðan hennar er þó talin stöðug. Hin konan fékk að fara heim að lokinni skoðun.

Nánar er fjallað um málið á fréttavefjum vestanhafs og einnig á vef BBC.