Nær 3.000 flugferðum aflýst á austurströnd Bandaríkjanna

Búið er að aflýsa nærri 3.000 flugferðum á austurströnd Bandaríkjanna vegna þess að í dag mun einn versti vetrarstormur í manna minnum ríða þar yfir.

Vindhviðurnar í þessum stormi munu ná fellibylsstyrk og reiknað er með að hann muni lama meira og minna allt athafnalíf í stórborgum á borð við New York og Boston.

Í Boston verður um blindbyl að ræða því þar er reiknað með að snjókoman í dag muni jafngilda hátt í einum metra af jafnföllnum snjó. Búist er við víðtækum rafmagnstruflunum og samgönguörðugleikum vegna stormsins.

Í frétt um málið á CNN segir að almenningur á austurströndinni hafi hamstrað mat og eldsneyti í gærdag til að búa sig undir komu þessa storms í dag.