Malala komin af sjúkrahúsi

Unga stúlkan sem skotin var í höfuðið af Talibana fyrir það eitt að sækjast eftir menntun og berjast fyrir kvenfrelsi er komin af spítala. Hún hefur enn ekki náð fullum bata en hér eftir mun hún dvelja á heimili foreldra sinna.

Í október síðastliðnum ruddist talibani inn í skólabíl í leit að Malölu. Þegar hann fann hana skaut hann hana í höfuðið. Síðan hefur Malala legið þungt haldin á sjúkrahúsi.

Talíbanar lýstu yfir ábyrgð á árásinni en talibanar eru mjög andsnúnir því að stúlkur fái menntun og því fannst þeim barátta Malölu ósiðleg.

Þótt Malala sé aðeins fjórtán ára gömul var hún vel þekkt í Pakistan fyrir baráttu sína fyrir menntun stúlkna fyrir árásina. Hún er einnig þekkt fyrir að tala opinskátt um voðaverk talibana. Í fyrra var hún tilnefnd til alþjóðlegra friðarverðlauna barna.

Eftir skotárásina hefur hún vakið heimsathygli og fengið tugþúsundir póstkorta og bréfa send á sjúkrahúsið þar sem fólk viðrar meðal annars þær skoðanir að hún eigi friðarverðlaun Nóbels skilin fyrir baráttu sína. Hún hefur aftur á móti líka fengið hótanir frá Talibönum vegna baráttu sinnar.