Tæplega 30 létust í námuslysi í Kína

Alls létust 27 verkamenn í kolanámu í Kína í nótt þegar sprenging varð í námunni sem er í Sichuan héraðinu í suðvesturhluta Kína. Yfir hundrað verkamenn voru í námunni þegar sprengingin varð.

Áttatíu og einum var bjargað en sextán slösuðust í sprengingunni. Þetta er annað mannskæða námuslysið í Kína um helgina en á föstudaginn létust tólf verkamenn þegar sprenging varð í kolanámu í öðru héraði.

Kínverska kolanámur eru alræmdar fyrir að vera hættulegar þrátt fyrir viðleitni yfirvalda til þess að auka öryggi námumanna. Yfir 1300 manns létust í námuslysum í Kína á síðasta ári og mátti rekja fjölmörg slysin til þess að ekki var farið eftir öryggisreglum.