Dræmur stuðningur íhaldsins

Yfirgnæfandi meirihluti breskra þingmanna samþykkti á þriðjudag lög um hjónabönd samkynhneigðra. Alls greiddu 400 þingmenn neðri deildar lögunum atkvæði sitt en 175 voru á móti.

Athygli vakti þó að einungis um helmingur þingmanna Íhaldsflokksins, flokks Davids Cameron forsætisráðherra, studdi lögin. Hinir voru ýmist á móti eða sátu hjá við atkvæðagreiðsluna.

Lögin taka ekki gildi fyrr en lávarðadeild breska þingsins hefur samþykkt þau, og reiknað er með að það ferli taki nokkra mánuði.

Gildistaka er áætluð árið 2015 en þá fengju samkynhneigðir rétt til að ganga í borgaraleg eða kirkjuleg hjónabönd. Ekki er þó hægt að krefjast trúarlegrar athafnar nema viðkomandi trúfélag samþykki.

Cameron forsætisráðherra sagði atkvæðagreiðsluna á þriðjudag vera stórt stökk fram á við fyrir þjóðina.

Nick Clegg, leiðtogi Frjálsra demókrata, sem á aðild að ríkisstjórn með Íhaldsflokki Camerons, tók undir það:

„Ég trúi því sannarlega að við munum horfa til þessa dags sem þáttaskila í sögu jafnréttis á Bretlandi."