Samkynhneigð hjón fá hæli

Samkynhneigð hjón frá Úganda hafa fengið hæli í Svíþjóð, en áður hafði öðrum manninum verið veitt hæli en hinum synjað um það.

Saga mannanna vakti mikla athygli í síðasta mánuði eftir að þeir urðu fyrsta samkynhneigða parið frá Úganda til þess að ganga í hjónaband. Þeir höfðu verið par í heimalandinu en flúðu til Svíþjóðar eftir ofsóknir vegna kynhneigðar sinnar.

Jimmy Sswerwadda flúði án vitundar kærasta síns árið 2008, eftir að hafa verið handtekinn og laminn. Þeir hittust svo fyrir tilviljun eftir að kærastinn, Lawrence Kaala, hafði líka flúið til Svíþjóðar. Kaala hafði orðið fyrir ofsóknum og fjölskylda hans hafði snúið við honum bakinu.

Sswerwadda hafði fengið dvalarleyfi í landinu en á sama tíma og parið gifti sig var Kaala synjað um leyfi. Parið áfrýjaði þeim úrskurði og hafði sigur í málinu í síðustu viku.