Þær meiðast alltaf sem eru með mér í herbergi

Allir taka eftir því hversu frábær andi er í íslenska kvennalandsliðinu og hin mikla samheldni í liðinu á örugglega mikinn þátt í einstökum árangri stelpnanna á EM í Svíþjóð. Stelpurnar ná vel saman innan sem utan vallar og það sést langar leiðir. Fréttablaðið kannaði það hvaða leikmenn eru saman í herbergi í ferðinni.

„Ég hef aldrei skipt mér af því hverjar eru saman í herbergi. Við erum með Möggu liðsstjóra (Margréti Ákadóttur) sem hefur séð um að raða leikmönnum saman. Það er þannig með margar að þær eiga góða vinkonu í liðinu og það eina sem ég sagði við Möggu var að þegar hún raðar leikmönnum saman í herbergi þá vil ég að leikmönnum líði vel saman. Þær eru mikið saman og þeim þarf að geta liðið vel þennan tíma. Það hefur alltaf verið þannig en svo er þessi hópur þannig að þetta eru allt góðar vinkonur sem hafa þekkst vel lengi. Þetta hefur aldrei verið neitt vandamál,“ segir landsliðsþjálfarinn Sigurður Ragnar Eyjólfsson um reglurnar um herbergisskipan leikmanna liðsins.

Þóra Björg ein í herbergi

„Það eru 23 leikmenn og einhver þurfti að vera ein. Þeir spurðu mig og þar sem að ég er eiginlega aldrei inni á herbergi þá skiptir það mig ekki máli. Ég bý eiginlega hjá Svölu sjúkraþjálfara hvort sem er,“ sagði Þóra Björg Helgadóttir, ein af markvörðum íslenska liðsins, og vísar til meiðsla sinna.

„Ég held að við ráðum þessu sjálfar að mestu leyti. Við getum komið með óskir og þá eru þær eldri vanalega spurðar. Ég hef ekki átt fastan herbergisfélaga síðan Laufey Ólafsdóttir hætti. Þær meiðast alltaf sem eru með mér í herbergi þannig að það er ágætt að hafa mig eina því þá verða engin skakkaföll,“ segir Þóra í léttum tón.

Ekki margar reglur

Sigurður Ragnar segir að það séu ekki margar reglur í gangi hjá stelpunum á Evrópumótinu í Svíþjóð. „Það er ekki mikið af reglum. Þær segja við mig þessar ungu sem koma upp í A-landsliðið að það sé ekki eins mikið af reglum hjá okkur og í 19 ára og 17 ára landsliðunum. Það er eðlilegt því þær eru orðnar fullorðnar núna og fá meira frjálsræði,“ segir Sigurður Ragnar.

„Þær fá frjálsan tíma þar sem þær geta farið út af hótelinu og gert það sem þær vilja á ákveðnum tímum. Þær læra samt smátt og smátt gildin sem eru í hópnum okkar og hvernig eldri leikmennirnir haga sér í undirbúningnum. Það er meira frjálsræði hjá okkur og ég hef ekki mikið af reglum. Þær hafa nýtt það frjálsræði vel, staðið sig mjög vel og gert allt fagmannlega,“ segir Sigurður Ragnar.