Vísindalegt bónorð vænlegt til vinnings

Bónorðin eru jafn fjölbreytt og þau eru mörg. Ástralskur eðlisfræðingur beitti vísindalegum aðferðum þegar hann bað um hönd kærustu sinnar á dögunum.

Sú heppna, Christie, greindi frá bónorðinu á vefsíðunni Reddit þar sem hún gengur undir nafninu Bogus_wheel.

Verðandi eiginmaður stúlkunnar, Brendan, rökstuddi hjónabandið í vísindalegri skýrslu um ástarsambandið. Skýrslan ber heitið Samspil tveggja líkama.

Þar lýsir Brendan sambandinu sem rannsókn sem staðið hefur yfir í ein sjö ár. Hann gekk svo langt að birta línurit til að færa sönnur á stigvaxandi hamingju þessa sambands.

Undir lok skýrslunnar lofar Brendan að halda rannsókninni til streitu um ókomin ár, það er, hann biður um hönd Christie. Hún þáði boðið.