Ganverskur kardináli gæti orðið næsti páfi

Benedikt sextándi páfi var tilfinningaríkur þegar hann ávarpaði tugi þúsunda gesta á Péturstorginu í Róm í gær. Var þetta í fyrsta sinn sem páfi kemur fram opinberlega frá því að hann tilkynnti að hann hygðist láta af embætti. Þegar Benedikt lætur af embætti verður hann fyrsti páfinn í 598 ár til að hætta. Mun hann þar með tapa öllum titlum og taka á ný upp sitt fyrra nafn, Joseph Ratzinger. Strax og páfi kynnti ákvörðun sína hófust vangaveltur um hver yrði eftirmaður hans. Sá sem þykir líklegastur til að verða næsti páfi er ítalski kardinálinn Gianfranco Ravasi. Þá eru háværar raddir um að Peter Turkson frá Gana verði kjörinn í starfið en hann yrði þar með fyrsti svarti páfinn. Þá þykja hinn kanadíski Marc Ouellet og hinn ítalski Tarcisio Bertone einnig koma til greina.