Tólf tímar af arineldi í norska ríkissjónvarpinu

Norska ríkissjónvarpið (NRK) var með tólf klukkustanda langa útsendingu frá arineldi síðasta föstudag.

Viðburðurinn kallaðist „Hel Ved" og á meðan eldurinn logaði gátu sjónvarpsáhorfendur hlustað á ýmsan fróðleik um eldivið frá sérfræðingum, ljóðalestur og tónlist.

Rune Moeklebust, dagskrárstjóri NRK, segir útsendinguna hafa verið „hægfara en göfugt sjónvarp". Hann bætir því við að Norðmenn eigi í sterku andlegu sambandi við eld, og án eldiviðar væri ólíft í Noregi.

NRK hefur áður bryddað upp á óvenjulegum nýungum í dagskrárgerð, en árið 2011 voru til dæmis sendar út 130 klukkustundir af siglandi skemmtiferðaskipi. Þegar hæst lét fylgdust um 600.000 Norðmenn með útsendingunni.