Víetnamar umfangsmiklir í kannabisræktun í Danmörku

Svo virðist sem Víetnamar séu orðnir umsvifamiklir í kannabisræktuninni í Danmörku.

Ekstra Bladet greinir frá því að sérsveit lögreglunnar á Jótlandi, kölluð Task Force Vest, hafi fjórum sinnum upprætt umfangsmikla kannabisræktun með stuttu millibili. Í öllum tilvikum voru það Víetnamar sem stóðu að ræktuninni.

Í Nordborg fann lögreglan í vikunni íbúðarhús sem hafði verið innréttað sérstaklega til ræktunnar á kannabis eða það sem Danir kallar skúnk. Tveir Víetnamar á fertugs- og fimmtugsaldri voru handteknir þegar þeir reyndu að flýja undan lögreglunni.

Nokkru síðar lét sérsveitin til skarar skríða í bænum Lysabild en þar fannst kannabisverksmiðja í fullum gangi og lagt var hald á mikið magn af efninu. Þar var Víetnami á fertugsaldri handtekinn.

Í tveimur aðgerðum í viðbót í Ribe og í grennd við Esbjerg voru fleiri Víetnamar handteknir og kannabisframleiðsla stöðvuð á báðum stöðunum.