Fjöldi slasaðra tvöfaldast

Talið er að um 950 manns hafi slasast þegar loftsteinn eða þyrping loftsteina sprakk yfir borginni Chelyabinsk nærri Úralfjöllum í Rússlandi.

Áður var talið að fjöldi slasaðra væri nærri 500 en í tilkynning sem yfirvöld á svæðinu sendu frá sér síðdegis er talan sögð nær 950.

Samkvæmt heimasíðu Nature þá leysti sprengingin úr læðingi jafnmikla orku og í kjarnorkusprengingu. Miklu meiri orku en í kjarnatilraun Norður-Kóreu á dögunum.

Guardian hefur eftir fjölmiðlinum Itar-Nass að sex metra breiður gígur hafi fundist nærri Chelyabinsk. Um 1,1 milljón manna búa í borginni sem er um 1770 kílómetra austan af Moskvu.

Vísindastofnun Rússlands telur að lofsteinninn eða þyrpingin hafi vegið um 10 tonn og hafi verið á 53 þúsund km/klst hraða. Sprengingin á að hafa gerst í 30-50 kílómetra fjarlægð frá yfirborði jarðar.